بەپێی جۆری قژت.. سودەکانی ئاوی گوڵ بۆ قژ و شێوازی بەکارهێنانی

ئاوی گوڵ رێژەیەکی زۆر لە ڤیتامینەکانی تێدایە، سودی گرنگ بە قژ دەگەیەنێت، یارمەتی شێدارکردنەوەی قژ دەدات، هەروەها تاڵەکان بەهێزدەکات و یارمەتی درێژبونەوەی قژ دەدات، سودەکانی بەپێی جۆری قژ دەگۆڕێت.

بۆ قژی چەور:
لە رەگەوە قژ بەهێزدەکات، کاریگەری هەیە لەسەر بریسکەدارکردنی قژ، هەروەها بۆنێکی خۆش و جیاوازی پێدەبەخشێت.

بۆ قژی سپی:
یەکێکە لەو پێکهاتانەی یارمەتی دواخستنی سپیبونی قژ دەدات، چونکە رێژەیەکی زۆر لە دژە ئۆکسانی تیدایە، کە خانەکانی پێست چالاک دەکات، رەنگی قژ وەکو خۆی دەهێڵێتەوە.

بۆ قژی وشک:
یارمەتی شێدارکردنەوەی پێستی سەر دەدات، پارێزگاری لەو تاڵانە دەکات کە زیانیان بەرکەوتوە، هەروەها پێستی سەر لە هەوکردن دەپارێزێت، کاردەکات بۆ لابردنی کرێشی قژ.

شێوازی بەکارهێنانی:
یەکەم: ئاوی گوڵ لەگەڵ گلسرین تێکەڵ بکە و بیدە لە قژت، بۆ ماوەی 30 خولەک جێی بهێڵه‌، دواتر بە شامپۆی تایبەت بە جۆری قژت بیشۆ، رۆژانە دوبارەی بکەرەوە.

دوەم: ئاوی گوڵ لەگەڵ سپێنەی هێلکە و کەمێک سرکەی سێو تێکەڵ بکە، بۆ ماوەی 20 خولەک بیدە لە قژت، دواتر بە ئاوی شلەتێن و شامپۆ بیشۆ، هەفتەی دوجار دوبارەی بکەرەوە.

سێیەم: زەردێنەی هێلکە و ئاوی گوڵ تێکەڵبکە، کەمێک زەیتی زەیتون یان زەیتی گوێزی هندی تێکەڵبکە، پاشان بیدە لە قژت بۆ ماوەی 30 خولەک، پاشان بە شامپۆ بیشۆ، هەفتەی دوجار دوبارەی بکەرەوە.